Тараз. Zhambylnews - Биыл Қордай ауданында жаңа оқу жылын 49 жалпы білім беретін мектеп 26700 оқушымен және 20 балалар бақшасы 3020 бүлдіршінмен бастайды, 31 мектеп жанындағы шағын орталықтарда 1843 бүлдіршін тәрбиеленетін болады. Білім саласына ағымдағы жылы аудан бойынша 6 миллиард 308 миллион теңге бөлініп, былтырғымен салыстырғанда 5 пайызға артты. Аудан мектептерінде 2447 мұғалім дәріс беретін болса, олардың 90 пайызы жоғары білімділер. Алдағы жаңа оқу жылында аудан бойынша 1-11 сыныптағы 13454 оқушы бюджет есебінен тегін ыстық тамақпен қамтылатын болады.
Жақсы жаңалықтардың бірі, жақында Қордай және Қақпатас ауылдарында бой көтерген жаңа мектептер есіктерін айқара ашпақ. Заман үрдісіне сай ауданымызда 8 мектеп «е-learning» бағдарламасына сәйкес толық жабдықталып, электронды оқыту жүйесіне енгізілді. Сонымен қатар, бөлім аудандағы мектептер жаңа оқу жылына және жылыту маусымына толығымен дайын.
«ZhambylNews» АА
