Тәуелсіздік күні мерекесі қарсаңында Байзақ ауданы Мырзатай ауылы округінде 60 орындық туберкулезге қарсы аурухана пайдалануға берілді. Денсаулық сақтау нысанының салтанатты ашылуына облыс басшысы Кәрім Көкрекбаев қатысты.- Еліміз егемендік алғалы бері Елбасы Нұрсұлтан Әбішұлы Назарбаев денсаулық сақтау саласының ұлттық жүйесін жаңғыртуға үлкен мән беріп келеді.Халқымызда «Басты байлық - денсаулық» деген сөз бар.Бұл – халық денсаулығы үшін жасалып отырған қадам. Халық денсаулығы үшін жасалып отырған осындай жасампаз тірліктер жалғаса берсін, - деді өз сөзінде өңір басшысы К.Көкрекбаев.
Аурухана құрылысына 1 168,4 млн. теңге, ал медициналық құрал-жабдықтар үшін 149,6 млн.теңге бөлінді. Әлеуметтік маңызы бар нысанды жобалаумен құрылыс жұмыстарын «Национальный центр Құрылысконсалтинг» ЖШС мен «Темир-Строй Сервис и Ко» ЖШС айналысты. Құрылыс жұмыстары өткен жылы сәуір айынан басталған.
Негізгі корпус үш қабаттан тұрады. Ауруханада 9 бөлім бар, сонымен қатар амбулаторлық бөлім, арнаулы оқшауланған қабылдау бөлімі, әкімшілік бөлім, паталого - анотомиялық корпус, зарарсыздандыру орталығы, бактериологиялық зертхана және т.б.
60 орындық туберкулезге қарсы диспансер Байзақ ауданы тұрғындарына жоғары кәсіби стационарлы медициналық көрсету және алдын-алу шараларын өткізумен қатар, туберкулезге шалдыққан науқастарға кешенді ем-дом жүргізуге бағытталған. Жаңа емханада барлығы 92 дәрігер, медбике еңбек етеді.
Айта кетерлік жайт, 2014 жылы 1 301,3 млн. теңге облыс бюджеті қаржысынан 25 денсаулық сақтау нысанының құрылысы жүргізіліп, пайдалануға берілді. Ал ағымдағы жылы 10 айдың қорытындысы бойынша, 2 денсаулық сақтау нысаны ашылған.
2016 жылы Тараз қаласында 300 орындық көпсалалы аурухана мен Меркі мен Талас аудандарында 2 емхана пайдалануға беріледі деп жоспарлануда.
