Тараз. Zhambylnews - Тараз қаласы әкімдігінің мәдениет және тілдерді дамыту бөлімінің ұйымдастыруымен ҚР Конституциясының 20 жылдығы аясында ҚР тұңғыш Президенті саябағында «Домбыра-пати» іс-шарасы өткізілді.Жалпы халықтық саз құралы ретінде домбыраны, ұмытыла бастаған игі дәстүрлерді қайтадан сәнге айналдыру және ұлттық өнерді насихаттау мақсатында өткізіліп отырған осы шара ұлт-аспаптық өнер ұжымдары мен домбырада ойнайтын барлық қала тұрғындары алдын-ала берілген хабарламалар бойынша шақырылды. Саябақтың ту тұғыры орналасқан алаңқайының жан-жағына орындықтар қойылып, өнерпаздар орналасты. Импровизацияланған сахна Ата Заң ұлттық нақышпен ұштастырыла отырып безендірілді. Шарада Тәттімбет, Құрманғазы, Дина, Сүгір, Түркеш, Қазанғап, Н.Тілендиев, Ә.Желдібаев, т.б. күйлері орындалды. Облыстық филармония жанынан құрылған ұлт-аспаптар оркестрі, «Шың», «Қарахан», «Өрлеу», т.б. ұлттық өнер ұжымдары да мерекелік іс-шараға атсалысты. Бағдарлама бойынша күй тартысты өнер ұжымдары бастап, әрі қарай жеке орындаушылар жалғастырды. Соңында барлығы бірігіп «Көңіл ашар» күйімен шараны аяқтады.
«ZhambylNews» АА
