Тараз. Zhambylnews – Ағымдағы  жылдың 1 тамызы мен 1 қыркүйек аралығында  2015-2016 оқу жылы қарсаңында «Мектепке оқулықпен» республикалық  акциясы  өткізілуде. Шара шеңберінде  1-7 тамыз аралығында мектеп кітапханаларының қорына түгендеу жүргізіліп, кітапханаларда  жинақталған  оқулықтарға мониторинг жасалды.   10-18  тамыз аралығында  облыстағы барлық  білім  мекемелерінде  мектеп оқушыларына оқулықтар таратылып берілді. Бұл туралы Жамбыл облыстық Білім басқармасының баспасөз қызметі хабарлайды.
Білім бөлімдерінің мәліметтеріне сәйкес, 2015-2016 оқу жылында 1 сыныпқа болжам бойынша 26 071 бала келеді деп күтілуде. 1 қыркүйек күні әрбір бірінші сынып оқушысына Қазақстан Республикасының Президенті Н.Ә.Назарбаевтың атынан «Менің Отаным - Қазақстан»  кітабы салтанатты түрде сыйға берілетін болады. Осы мақсатта жергілікті бюджеттен  23 млн. 864 мың теңге бөлініп, 26 мың 570 дана кітап сатып алынды. 
Сонымен қатар, білім мекемелерінде «Сыйлыққа – оқулық», «Мектебіңе кітап сыйла» тақырыбында ақциялар ұйымдастырылып,  өткізілуде.  
2015 жылы  оқулықтарды қайта басып шығару кестесіне сәйкес 4, 5, 6, 11 сыныптарға арналған оқулықтар мен оқу-әдістемелік кешендеріне және   3 сыныптың ағылшын тілі, 7 сыныптың  информатика пәні оқулықтарына  тапсырыс беріліп, «Атамұра», «Мектеп», «Алматыкітап», «Арман ПВ», «Келешек-2030», Cambridge University Press»,  «Macmillan»,  «Жазушы»,  «Білім», «Фолиант»  баспаларымен  келісім-шарттар жасалынды. 
Жалпы облыс бойынша оларды сатып алуға, тасымалдауға  918 млн  683 мың    теңге бөлінді. 

2015-2016 оқу жылында 1-11 сынып оқушылары оқулықтармен толық  қамтылатын болады.